විදුහල්පති පණිවිඩය

 මාර මොරවක බෞද්ධ මහා විද්‍යාලය වන අප විද්‍යාලය දකුණු පළාත තුළ මෙන්ම දෙනියාය අධ්‍යාපන කලාපය තුළ ද ඉමහත් කීර්තියක් අත්පත් කරගෙන ඇති පාසලකි. දැනුම ලබා දීමෙන් පමණක් ම ගුණාත්මක දරුවෙකු නිර්මාණය කළ නොහැකි බව වටහාගනිමින් දරුවන්ගේ යහගුණදම් වර්ධනයට ද සුවිශේෂී අන්තර්ගතයක් සකස් කරමින් ඒ ඔස්සේ ක්‍රියාත්මක වීම අප පාසලේ ඇති සුවිශේෂීත්වයයි. අප පාසලේ දරුදැරියන් අධ්‍යාපන අංශය ඔස්සේ විෂය බාහිර ව මෙන් ම මෙන්ම විෂය සමගාමී ව දක්වනු ලබන දස්කම් විස්කම් සැබවින්ම ඉතා ඉහළය. ශ්‍රේණිය ශිෂ්‍යත්ව විභාගය, අ.පො.ස සාමාන්‍ය පෙළ විභාගය, මෙන්ම අ.පො.ස උසස් පෙළ විභාග වලින් විශිෂ්ට ලෙස දරුවන් පෑ දස්කම් මෙන්ම සෞන්දර්ය, ක්‍රීඩා ආදී කටයුතු තුළදී පළාත් හා ජාතික වශයෙන් දරුවන් පාසලට අත්කර දී ඇති කීර්තිය ඉතා අගනේය.
පාසලක් වශයෙන් දරුවන්ගේ මෘදු කුසලතා සංවර්ධනය උදෙසා අප අනුගමනය කරනු ලබන ක්‍රියාදාමය ඔස්සේ නොසැළෙන පෞරුෂයකින් යුතු දරු පරපුරක් දැයට තිළිණ කිරීමේ භාග්‍ය අප ලබා ඇත. නවීන තාක්ෂණික පරිවර්තනයන් ඔස්සේ මුළුමහත් විශ්වයම ඉදිරි ගමනකට අවතීර්ණ වී ඇති යුගයක පාසලක් වශයෙන් අප ද නවීන තාක්ෂණයේ ඵලදායී අංශය දරුවන් හා එක්ව භුක්ති විඳිමින් සිටියි. එහි ප්‍රතිඵලයක් වශයෙන් පාසල වෙනුවෙන් මෙම නිල වෙබ් අඩවිය නිර්මාණය කරන ලදි. යාවත්කාලීන තොරතුරු පළ කිරීම ඔස්සේ පාසලේ අභිවෘද්ධිය උදෙසා නිරන්තර ක්‍රියා කරමින් සිටින සෑම පාර්ශවයක් සමග ම ඵලදායි සන්නිවේදන කාර්‍යයක් සිදු කිරීමට මෙම වෙබ් අඩවිය ඉතා සුවිශේෂී තෝතැන්නක් වනු ඇතැයි මම අපේක්ෂා කරමි.තවද අප විද්‍යාලය පිළිබඳ තොරතුරු නොදන්නා පාර්ශවයන්ට ද විද්‍යාලයයේ යාවත්කාලීන තොරතුරු ක්ෂණිකව ලබා ගත හැකි මාධ්‍යයක් වශයෙන් ද මෙම වෙබ් අඩවිය පරිශීලනය කළ හැකි වේ. පාසලට හිතෛෂී ඔබසැම විසිරී නොව එකම සමූහයක් වශයෙන් පාසල සමග බැඳී සිටීමට මෙම වෙබ් අඩවිය මනා පිටුවහලක් වනු ඇත. මෙම වෙබ් අඩවිය සමග අඛණ්ඩව රැඳී සිටිමින් පාසලේ අනාගත ගමන් මග සාර්ථක කර ගැනීමේ කාර්‍යයට ඵලදායි අයුරින් දායක වන ලෙස සැමට ආරාධනා කරමි.

නියෝජ්‍ය විදුහල්පති;
මොරවක බෞද්ධ මහා විද්‍යාලය.